Atasını qətlə yetirən oğulun məhkəməsi | Təqsirləndirilənin psixi pozğunluğu var?

Bakıda atasını qətlə yetirməkdə təqsirləndirilən Murad Əmirovun cinayət işi üzrə məhkəmə baxışı keçirilib.

Bakı Ağır Cinayətlər Məhkəməsində hakim Mahirə Kərimovanın sədrliyi ilə baş tutan iclasda təqsirləndirilən Murad Əmirovun epilepsiya xəstəliyindən müalicə aldığı xəstəxananın həkimi Mədinə Zülfüqarova təqsirləndirilən şəxsin həqiqətən də həmin xəstəxanada müalicə aldığını təsdiqləyərək onun psixoloji problemlərinin olduğunu deyib.

Daha sonra Murad Əmirovun anası Arzu Əmirova şahid qismində ifadə verərək deyib ki, mərhum həyat yoldaşı spirtli içki və narkotik maddə aludəçisi olub.

“Hadisə baş verən gün yoldaşım evdə səs-küy saldı. Oğlum Murad yatmışdı, səsə ayılıb atasına sakit olmasını dedi. Nizami isə aşağı düşüb dəmir parçasını götürərək Muradı döyməyə başladı. Oğlumun başı qan içində idi. Bundan sonra Murad mətbəxdən bıçağı götürüb atasına zərbələr endirib”, ‒ deyə o, ifadəsində bildirib.

İstintaq materiallarına əsasən, Murad Əmirov atasına 8 bıçaq zərbəsi vurub. Nizami Əmirov aldığı xəsarətlərdən xəstəxanada həyatını itirib.

Qeyd edək ki, hadisə 2023-cü ilin may ayında Yasamal rayonu, Rahib Tağıyev küçəsində baş verib. 1992-ci il təvəllüdlü Murad Əmirov atasını ailədaxili mübahisə zəminində qətlə yetirməkdə təqsirləndirilir.

Murad Əmirov hadisədən sonra Yasamal Rayon Polis İdarəsinin əməkdaşları tərəfindən saxlanılıb.

Faktla bağlı Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanılıb.