Azovda azərbaycanlıların olduğu iki gəmiyə PUA hücumu | XİN-dən təcili məlumat - Baku TV

Azov dənizində baş verən dron hücumu Azərbaycan vətəndaşlarının ölümü ilə nəticələnib.

Xarici İşlər Nazirliyinin məlumatına görə, iyunun 5-nə keçən gecə Taqanroq körfəzində iki xarici yük gəmisi “Natra” və “Zirkon” pilotsuz uçuş aparatlarının hücumuna məruz qalıb. Həmin gəmilərin heyətində ümumilikdə 25 Azərbaycan vətəndaşı olub.

Nazirliyin sözçüsü Ayxan Hacızadə bildirib ki, hücum nəticəsində 5 Azərbaycan vətəndaşı həlak olub, daha 3 nəfər isə yaralanıb. Yaralılar Rusiyanın Yeysk şəhərindəki xəstəxanaya yerləşdiriliblər.

Qeyd olunub ki, hücuma məruz qalan gəmilər Azərbaycan dövlətinə məxsus deyil.

Hazırda Xarici İşlər Nazirliyi aidiyyəti dövlət qurumları, Azərbaycanın xaricdəki diplomatik nümayəndəlikləri və müvafiq ölkələrin səlahiyyətli orqanları ilə əlaqələndirmə işləri aparır.

Rusiyadakı səfirliyin əməkdaşları hadisə yerinə göndərilib. Vətəndaşların vəziyyəti, onların ölkəyə qaytarılması və zəruri konsulluq yardımının göstərilməsi məsələləri nəzarətdə saxlanılır.

Xarici İşlər Nazirliyi həlak olanların ailələrinə və yaxınlarına başsağlığı verib, yaralananlara isə tezliklə şəfa diləyib.