Bakıda ata qızını telefon üstündə qətlə yetirib? - Həbsdən çıxan ata görün nə etdi

Bakıda qızını xüsusi amansızlıqla öldürməkdə təqsirləndirilən Yelmar Atakişiyevin cinayət işinin məhkəmə baxışı keçirilib.

Bakı Ağır Cinayətlər Məhkəməsinin hakimi Elnur Nuriyevin sədrliyi ilə keçirilən prosesdə dövlət ittihamçısı ittiham aktını elan edib.

İttihamda bildirilir ki, əvvəllər Cinayət Məcəlləsinin müxtəlif maddələri ilə ittiham olunmuş Yelmar Atakişiyev həbsxanada olarkən qızı Cəmalə Atakişiyeva haqqında müxtəlif xoşagəlməz məlumatlar alıb.

Cəzasını başa vurduqdan sonra məsələyə aydınlıq gətirmək üçün qızının yaşadığı evə gələrək onunla mübahisə edib. Mübahisə zamanı Yelmar Atakişiyev qızına əli və ayağı ilə çoxsaylı zərbələr endirərək onun huşunun itirilməsinə səbəb olub.

İttiham aktına görə, Yelmar Atakişiyev qızının halsız vəziyyətini kənardan seyr edərək ona heç bir yardım etməyib və ölməsinə zəmin yaradıb. Prosesdə təqsirləndirilənə sərbəst ifadə üçün söz verilib. Yelmar Atakişiyev ifadəsi zamanı qızına hər hansı bir işgəncə vermədiyini, sadəcə onu tənbeh etmək məqsədilə sifətinə əli ilə bir neçə zərbə vurduğunu deyib.

Təqsirləndirilən daha sonra vurğulayıb ki, onun qızını öldürmək fikri olmayıb, döyməsinin əsas səbəbi isə Cəmalənin iki telefon işlətdiyi halda bunu atasından gizlətməsi olub.

Cəmalə Atakişiyevanı köməksiz vəziyyətdə qoyaraq hadisə yerini tərk etdikdən bir neçə saat sonra Yelmar Atakişiyev xəbər tutub ki, qızı aldığı zərbələrdən ölüb. Məhkəmənin növbəti prosesi mayın 2-də keçiriləcək.

Qeyd edək ki, hadisə 2024-cü ilin noyabrında Bakının Zabrat qəsəbəsində baş verib. Belə ki, qəsəbə sakini, 42 yaşlı Cəmalə Atakişiyevanın yaşadığı evdə qətlə yetirilməsi ilə bağlı Sabunçu rayon hüquq-mühafizə orqanlarına məlumat daxil olub.

İlkin araşdırmalarla Yelmar Atakişiyevin qızı Cəmalə Atakişiyevanı qətlə yetirməsinə əsaslı şübhələr müəyyən edilib. Yelmar Atakişiyev saxlanılaraq barəsində Cinayət Məcəlləsinin 120.2.4-cü (xüsusi amansızlıqla və ya ümumi təhlükəli üsulla adam öldürmə) maddəsi ilə ittiham irəli sürülüb.