Bakıda idarəetməni itirən sürücü qəza törədib

Bakının Nərimanov rayonunda 2 avtomobilin iştirakı ilə yol-nəqliyyat hadisəsi baş verib.

Qəza Həsən Əliyev küçəsində, Ukrayna səfirliyinin qarşısında qeydə alınıb.

Belə ki, H.Əliyev küçəsindəki tuneldə yüksək sürətlə hərəkətdə olan “BMW” markalı avtomobilin sürücüsü idarəetməni itirib.

Nəticədə nəqliyyat vasitəsi yol kənarında hərəkətsiz vəziyyətdə dayanmış “Hyundai” markalı avtomobilə çırpılıb.

Hadisəni törədən və şəxsiyyəti hələlik məlum olmayan “BMW” markalı avtomobilin sürücüsü ərazidən yayınıb.

Qəza nəticəsində bir nəfər xəsarət alıb.

Zərbənin təsirindən avtomobilin yanacağı yola dağılıb.

Əraziyə FHN-in Dövlət Yanğından Mühafizə Xidmətinin briqadası və Nərimanov Rayon Dövlət Yol Polis İdarəsinin əməkdaşları cəlb edilib.

Polis əməkdaşları başqa hadisənin baş verməməsi üçün yolda tənzimləmə işləri aparıb.

İlkin məlumata görə, “BMW” markalı avtomobilin sürücüsü nəqliyyat vasitəsini sərxoş vəziyyətdə idarə edib.

Faktla bağlı araşdırma aparılır.

Kamil Əmirli
Elşad Mətləboğlu