Bakıda mağazadan quldurluq edənə ağır cəza verildi - Baku TV

Bakıda quldurluq etməkdə təqsirləndirilən Xəyal Yusifovun cinayət işinin məhkəmə istintaqı yekunlaşıb.

Bakı Ağır Cinayətlər Məhkəməsinin hakimi Kamil Əliyevin sədrliyi ilə keçirilən iclasda dövlət ittihamçısı təqsirləndirilən şəxsin səkkiz il müddətinə azadlıqdan məhrum olunmasını məhkəməyə təklif edib. Müşavirədən sonra hökm elan edilərək Xəyal Yusifov səkkiz il müddətinə azadlıqdan məhrum edilib.

Qeyd edək ki, hadisə 2025-ci il martın 6-da axşam saatlarında paytaxtın Nizami rayonunda yerləşən şərab evlərinin birində baş verib. Polisə naməlum şəxs tərəfindən həmin yerdə çalışan 21 yaşlı satıcını kəsici-deşici alətlə hədələyərək içərisində 1000 manat olan kassa aparatını talaması barədə məlumat daxil olub.

Nizami Rayon Polis İdarəsi 25-ci Polis Şöbəsinin əməkdaşlarının keçirdikləri tədbirlər nəticəsində quldurluq əməlini törətməkdə şübhəli bilinən 29 yaşlı Xəyal Yusifov müəyyən olunaraq saxlanılıb.

Onu da qeyd edək ki, hadisənin görüntüləri veb-kameralar vasitəsilə anbaan qeydə alınıb. Faktla bağlı cinayət işi başlanılıb və Xəyal Yusifova qarşı Cinayət Məcəlləsinin quldurluq maddəsi ilə ittiham irəli sürülüb.