Bakıda məktəbli anasının həyatına son qoydu

2022-ci il aprelin 20-də Daxili İşlər Nazirliyinin “102” xidmətinə saat 12:14-də naməlum qadının bıçaqlanması, cinayəti törədən şəxsin bıçağı ataraq hadisə yerindən qaçması barədə məlumat daxil olub.

Hadisə Nizami rayonu, Rüstəm Rüstəmov küçəsi, 48 nömrəli binanın yaxınlığında baş verib. Əraziyə Nizami Rayon Polis İdarəsinin 24-cü Polis Şöbəsinin əməkdaşları cəlb olunub. Hadisə yerinə baxış zamanı “Mitsibishi” markalı avtomobilin sağ ön hissəsində qadın meyiti, sağ tərəfdə üzərində qan ləkələri olan mətbəx bıçağı, 1 metr aralıda isə məktəbli çantası aşkarlanıb. Elə həmin gün öldürülən qadının oğlu 15 yaşlı İdeal Məmmədzadə saxlanılıb.

Faktla bağlı Nizami Rayon Prokurorluğunda Cinayət Məcəlləsinin qəsdən adam öldürmə maddəsi ilə cinayət işi başlanılıb.

Məhkəmə-tibbi ekspertizasının rəyinə görə, 33 yaşlı Sevinc Məhərrəmovanın ölümünə mədə və mədəaltı vəzinin zədələnməsi ilə əlaqədar baş verən kəskin qanitirmə səbəb olub.

Məhkəmə-psixoloji ekspertizasının rəyinə görə, İdeal Məmmədzadə cinayət əməlini törədərkən hərəkətlərinin faktiki xarakterini dərk edib. Məhkəmə iclasında o, ittiham üzrə özünü təqsirli bilib. Sevinc Məhərrəmovanın anası Sayalı Məhərrəmova məhkəməyə notarial qaydada təsdiq olunmuş barışıq ərizəsini təqdim edib.

Məhkəmə nəticəyə gəlib ki, İdeal Məmmədzadənin cinayət əməli tam sübuta yetirilib. Bakı Ağır Cinayətlər Məhkəməsinin hökmü ilə o, cəzasını ümumi rejimli tərbiyyə müəssisəsində çəkməklə 5 il müddətinə azadlıqdan məhrum edilib.