Bakıda polisə müqavimət göstərən narkotacir zərərsizləşdirildi | Saxlanılanlar var

Bakının Qaradağ rayonu ərazisində narkotik vasitələrin qanunsuz dövriyyəsində şübhəli bilinən şəxslər polis əməkdaşlarına müqavimət göstərməklə qaçmağa cəhd ediblər.

Daxili İşlər Nazirliyinin Mətbuat Xidmətindən verilən məlumata görə, 29 yaşlı Tehran Məmmədov idarə etdiyi "VAZ-2104" markalı avtomobillə "saxla" əmrinə tabe olmayıb. İdarəetməni itirərək yol kənarında olan maneəyə çırpıldıqdan sonra polis əməkdaşlarına üzərində olan bıçaqla müqavimət göstərib.

Tehran Məmmədova dəfələrlə xəbərdarlıq edilməsinə baxmayaraq, o, avtomobildə olan digər şəxsin qaçması üçün qanunsuz tələblər irəli sürüb. Polis əməkdaşı xidməti tabel silahı tətbiq etməklə onu zərərsizləşdirib, daha 1 nəfər isə saxlanılıb.

Avtomobildən 10 kq narkotik vasitə aşkar olunaraq götürülüb. Fakta bağlı cinayət işi başlanılıb, istintaq tədbirləri görülür.