Bakıda qandonduran qətl | Ailə münaqişəsi faciəyə çevrildi

2023-cü il dekabrın 2-də Qara Qarayev prospektində ailədaxili münaqişə qətllə yekunlaşıb.

Paytaxt sakini, 43 yaşlı Həsən Həsrətov qaynı, 44 yaşlı Rasim Zamanovu öldürüb. O, daha sonra Nizami Rayon Polis İdarəsinin 25-ci Polis Şöbəsinə gələrək törətdiyi cinayəti etiraf edib.

Faktla bağlı Cinayət Məcəlləsinin qəsdən adam öldürmə maddəsi ilə cinayət işi başlanılıb.

İstintaqla müəyyən olunub ki, Həsən Həsrətov yaşadığı evdə qaynı Rasimin oğlu Süleyman Zamanovu vurduqdan sonra Süleyman bu barədə atasına məlumat verib. Rasim məsələni aydınlaşdırmaq üçün evin qarşısına gəlib. Həsən isə evdən çıxarkən cibinə mətbəx bıçağı qoyub və binanın həyətində onu gözləyən Rasimi yerə yıxaraq 7 bıçaq zərbəsi endirib. Rasim Zamanov xəstəxanaya aparılsa da, aldığı xəsarətlərdən ölüb.

Həsən Həsrətov məhkəmədə əməlindən peşman olduğunu bildirib, lakin özünü yalnız qismən təqsirli sayıb.

Bakı Ağır Cinayətlər Məhkəməsinin hökmü ilə Həsən Həsrətov Cinayət Məcəlləsinin xüsusi amansızlıqla adam öldürmə maddəsi ilə təqsirli bilinərək 18 il müddətinə azadlıqdan məhrum edilib.