Bakıdan Naxçıvana gedən avtomobil saxlanıldı | İrandan Azərbaycana...

İrandan Azərbaycana qanunsuz olaraq 17 ton yük gətirən avtomobil saxlanılıb.

Naxçıvan Baş Gömrük İdarəsindən verilən məlumata görə, qurumun Əməliyyat və İstintaq İdarəsinə əməliyyat məlumatı daxil olub.

İnformasiyaya görə, İrandan tranzit keçməklə Bakıdan Naxçıvana qarışıq təsərrüfat malları yükü gətirən Azərbaycan vətəndaşının idarə etdiyi yük nəqliyyat vasitəsindən yol-nəqliyyat sənədində qeyd olunan 18 tona yaxın avtomobil ehtiyyat hissələri İran ərazisində boşaldılıb. Həmin yükün yerinə 17 tondan artıq döşəmə daşı yüklənib.

Nəqliyyat vasitəsi mayın 29-u saat 21:50-də Azərbaycanın “Biləsuvar” dövlət sərhədindən buraxılış məntəqəsində qeydiyyata alınaraq ölkədən çıxış edib. İyunun 2-i saat 04:52-də isə “Culfa” dövlət sərhədindən buraxılış məntəqəsindən Muxtar Respublika ərazisinə daxil olub. Yükə qanunsuz müdaxilə zamanı istifadə olunan yapışdırıcı və digər vasitələr, qırılıb sonradan yapışdırılan gömrük təminatları maddi sübut kimi götürülüb.

Faktla bağlı araşdırma aparılır.