“Beniz”ə mən zərər vurmuşam” | Tiktokerin məhkəməsində nələr açıqlandı?

Tanınmış tiktoker, "Beniz" ləqəbli Aybəniz Xəlilovanın cinayət işi üzrə məhkəmənin növbəti iclası keçirilib.

Bakı Ağır Cinayətlər Məhkəməsinin hakimi Fəxri Məmmədovun sədrliyi ilə keçirilən iclasda vəkilin vəsatəti əsasında Türkiyədə müalicə alan zərərçəkən Xalid Kərimovun videokonfransla prosesə qoşulması təmin edilib.

Zərərçəkən sərbəst ifadəsi zamanı vurğulayıb ki, təqsirləndirilən Aybəniz Xəlilova ilə yaxın münasibəti olub, aralarında yaranmış müəyyən söz-söhbətə görə “Beniz” onun ünvanına sosial şəbəkə vasitəsiylə xoşagəlməz ifadələr işlətdiyi üçün onu cəzalandırmaq qərarına gəlib. Xalid Kərimov bununla bağlı vəkil Nüşabə Ağayevanın vasitəsilə Suraxanı Rayon Polis idarəsinə müraciət edib. Məlum hadisələr də məhz bundan sonra baş verib.

Zərərçəkən ifadəsi zamanı həmçinin vurğulayıb ki, o tiktoker xanım tərəfindən nəinki hər hansı bir zərər görməyib, hətta özü “Beniz”ə ciddi zərər vurub. Özünə dəyən əsas zərəri isə bu işlə əlaqəli müəyyən şəxslərdən gördüyünü də deyib.

Müdafiə tərəfi isə öz növbəsində bununla bağlı əldə olunmuş müəyyən telefon qeydlərini məhkəməyə təqdim etməyə hazır olduğunu hakim heyətinin diqqətinə çatdırıb.

Aybəniz Xəlilovanın vəkili zərərçəkənin bu ifadəsindən sonra müvəkkilinin ev dustaqlığına buraxılması ilə bağlı yenidən məhkəməyə vəsatət təqdim edib.

Müşavirədən sonra vəsatət yenə də təmin edilməyib. Növbəti proses sentyabrın 30-na təyin edilib.