Biləsuvar sakini həmyerlisini güllələdi | Qandonduran hadisə

Biləsuvarda silahlı insident baş verib. Hadisə şəhərin Nizami küçəsində qeydə alınıb.

Rayon sakini 42 yaşlı Elməddin Əzizağa oğlu Cəfərov həmyerlisi 30 yaşlı Raul Quliyev tərəfindən ov tüfəngindən atəş açılmaqla yaralanıb. Ayağ nahiyəsindən xəsarət alan Elməddin Cəfərov Rayon Mərkəzi Xəstəxanasına çatdırılıb.

Məlumata görə, münaqişə tərəfi olan şəxslər əvvəlcə rayon mərkəzində olan çayxanada mübahisə ediblər. Mübahisə zamanı Elməddin Cəfərov həmyerlisinə şillə vurub. Daha sonra rayonun Nərimankənd sakini olan Raul Quliyev çayxananı tərk edərək evə gedib. O, ov tüfəngi götürərək yenidən çayxanaya qayıtmaq istəyib. Yaxınları onu dayandırmağa çalışsalar da, buna nail ola bilməyiblər. Çayxanaya gələn Raul Elməddin Cəfərovun ayağına atəş açıb. Lakin cinayəti törədən şəxsin sonrakı planını həyata keçirməsinə yaxınları mane olub və tüfəngi onun əlindən alıblar. Yaralanan şəxs isə ətrafdakıların köməyi ilə rayon xəstəxanasına aparılıb.

Baş vermiş hadisə ilə bağlı Daxili İşlər Nazirliyinin Mətbuat Xidmətinin cənub regional qrupundan verilən məlumata görə, cinayət əməlini törətməkdə şübhəli bilinən Raul Quliyev artıq polis əməkdaşları tərəfindən saxlanılıb.

Baş vermiş hadisənin motivləri müvafiq hüquq orqanları tərəfindən araşdırılır.