Biləsuvarda dəhşətli partlayış

Biləsuvarda yaşayış binasında partlayış olub. Hadisə rayonun Heydər Əliyev prospektində yerləşən beşmərtəbəli binanın 5-ci mərtəbəsində qeydə alınıb.

Dərhal Fövqəladə Hallar Nazirliyinin adiyyatı qurumları hadisə yerinə cəlb edilib. Dağıntılar altında qalan 2 nəfər şəxs xilas edilərək xəstəxanaya yerləşdirilib. Partlayış baş verən mənzilə baxış zamanı tavan və dam örtüyünün çökməsi müəyyən edilib. İlkin ehtimala görə, partlayışa səbəb qaz sızması olub.

Baş verən hadisənin bəzi təfərrüatları da məlum olub. "Report"un əldə etdiyi məlumata görə, hadisə Nazilə Məmmədovaya məxsus mənzildə qeydə alınıb. Belə ki, partlayış orda kirayədə yaşayan rayon sakini 1988-ci il təvəllüdlü Günay Əliyeva mənzilə daxil olan zaman baş verib. Həmin vaxt onun yanında övladları – 2009-ci il təvəllüdlü qızı və 2013-cü il təvəllüdlü oğlu da olub. Məlumata görə, hadisə vaxtı qadının həyat yoldaşı həyətdə olduğundan o, xəsarət almayıb.

Hadisədən sonra mənzil tamamilə dağılıb. Xilasetmə tədbirləri nəticəsində ananın hər iki övladı ağır vəziyyətdə xilas edilərək rayon xəstəxanasına aparılıb. Hazırda ananın axtarışları davam etdirilir.

Faktla bağlı Biləsuvar Rayon Prokurorluğunda Cinayət Məcəlləsinin ağır nəticələrə səbəb olan səhlənkarlıq maddəsi ilə cinayət işi başlanaraq ibtidai istintaq aparılır.