Binəqədidə 10 nəfərin öldüyü sexdən son görüntülər

Xəbər verdiyimiz kimi, yanvarın 15-ində Binəqədidə mebel sexində baş verən partlayış 10 nəfərin ölümünə, 23 nəfərin isə müxtəlif bədən xəsarətləri almasına səbəb olub.

Baku TV partlayışın baş verdiyi ərazidə olub.

Bildirilib ki, müxtəlif mebel materiallarının istehsal olunduğu ərazidə baş verən partlayış ətrafdakı 2700 kvadratmetr ərazini məhv edib.

Aparılan araşdırmalara görə, “Bakı Ağac Emalı” ASC-yə məxsus sexlərdə, ümumiyyətlə, təhlükəsizlik qaydalarına əməl olunmayıb. Elə hadisənin başvermə səbəblərindən biri də budur. Burada fəaliyyət göstərən sexlərdə taxta emalı zamanı taxta tozunun və kimyəvi tərkibli maddələrin buxara qarışığının tənzimlənməməsi partlayış hadisəsinə səbəb olub.

Diqqətçəkən daha bir məqam odur ki, bu, ərazidə baş verən ilk belə hadisə deyil. Belə ki, 2013-cü ildə də həmin sexdə yanğın olub və bir nəfər həlak olub.

Daha sonra 2018-ci ildə təxminən 500 kvadratmetr ərazidə təkər şinləri yanıb. 2022-ci ildə isə Ağac Emalı Zavodunun ərazisində 900 kvadratmetr sahədə məişət tullantıları və yararsız təkərlər, 3 ağac və yaxınlıqda ümumi sahəsi 8 kvadratmetr olan külafirənginin konstruksiyaları yanıb.