Birlikdə yaşadığı qadını əxlaqsız deyib qətlə yetirdi | Hökm oxundu

Qeyri-rəsmi nikahda yaşadığı qadını xüsusi amansızlıqla qətlə yetirməkdə təqsirləndirilən Yevlax rayon sakini Teymur Məmmədova hökm oxunub.

Məhkəmə Bakı Ağır Cinayətlər Məhkəməsinin hakimi Əli Məmmədovun sədrliyi ilə baş tutub. Hökmə əsasən, Teymur Məmmədov 18 il müddətinə azadlıqdan məhrum edilib. Prokuror Eldar Həmzə məhkəmədən təqsirləndirilən şəxsin 19 il 2 ay müddətinə azadlıqdan məhrum edilməsini istəmişdi.

İttiham aktına əsasən, Teymur Məmmədov xəyanət etməsinə, əxlaqsız həyat tərzi keçirməsinə, habelə narkotik vasitələrdən istifadə etməsinə dair əsassız şübhələrini bəhanə edərək qeyri-rəsmi nikahda yaşadığı 1994-cü il təvəllüdlü Tacirə Salmanovanı qəsdən öldürmək qərarına gəlib.

Təqsirləndirilən şəxs 2023-cü il avqustun 6-da Tacirə Salmanovanı Bakı şəhəri Nərimanov rayonu ərazisində birgə kirayədə yaşadıqları evdə övladlarının gözü qarşısında qətlə yetirib. İstintaqla müəyyən edilib ki, o, qadının bədəninin müxtəlif nahiyələrinə xüsusi amansızlıqla ümumilikdə 25 bıçaq zərbəsi vurub.

Qeyd edək ki, Teymur Məmmədov əvvəllər də Cinayət Məcəlləsinin müxtəlif maddələri ilə 4 dəfə həbsdə olub. O, sonuncu dəfə azadlığa çıxandan 4 gün sonra Tacirə Salmanovanı qətlə yetirib. Teymur Məmmədova qarşı Cinayət Məcəlləsinin 120.2.2-ci və 120.2.4-cü – xuliqanlıq niyyəti ilə, xüsusi amansızlıqla və ümumi təhlükəli üsulla qəsdən adam öldürmə maddələri ilə ittiham irəli sürülüb.