Boşanmış qadının gənc sevgilisinə bu təklifi ağlasığmaz qətllə bitdi - SONUNCU ŞAHİD

Qadın özündən yaşca kiçik sevgilisini bıçaqlayaraq qətlə yetirib.

Belə ki, Ruqiyyə Vəzirova (ad və soyadlar şərtidir) bir neçə il ailəli olsa da, övladı olmur və həyat yoldaşı ilə yaranan narazılıq səbəbindən boşanır.

Öz biznesini quraraq şəhərdə tək yaşamağa başlayan Ruqiyyə bir müddət sonra Həbib Həsənoğlu ilə sosial şəbəkədə tanış olur və şəxsi həyatına yenidən diqqət ayırır.

Günlərin birində Ruqiyyə və Həbib restorana gedərək spirtli içki qəbul edir və rəqs edirlər. Daha sonra Səadət sarayının qarşısından keçərkən Ruqiyyə Həbibə münasibətlərini rəsmiləşdirmək istədiyini deyir. Həbib isə buna hazır olmadığını bildirərək binaya daxil olmur. Ruqiyyə bu davranışdan sarsılsa da, özünü ələ almağa çalışır.

Cütlük bir neçə gün sonra Ruqiyyənin mənzilinə gedir. Ruqiyyə Həbibə münasibətlərinə qeyri-ciddi yanaşdığını və namusunu ləkələdiyini deyir. Həbib isə “evlənmək istəmirəm, əl çək” ifadəsini işlədir. Bu zaman Ruqiyyə mətbəxdən götürdüyü bıçaqla ona zərbələr endirir.

Hadisədən sonra Ruqiyyə polisə zəng edərək təslim olur.