Cəlilabadda Diaqnostika Mərkəzində yanğın
Cəlilabad Müalicə Diaqnostika Mərkəzində yanğın baş verib.
Hadisə yerinə Fövqəladə Hallar Nazirliyinin yanğınsöndürənləri və texnikaları cəlb olunub. Birinci mərtəbənin tavanında elektrik naqillərindən qaynaqlanan tüstülənmə yayılıb və elektrik enerjisinin verlişi dayandırılıb. Bundan sonra dializ aparatına qoşulan 60 yaşlı Arzu Qasımovun vəfat etdiyi bildirilir.
Məsələ ilə bağlı TƏBİB-dən bildirilib ki, 1962-ci il təvəllüdlü vətəndaş bu il fevralın 19-da komatoz vəziyyətdə Cəlilabad Müalicə Diaqnostika Mərkəzinin Reanimasiya şöbəsinə qəbul olunub. Dializ xəstəsi uremik vəziyyətdə olduğuna görə səhər saatlarında dializ aparatına qoşulub. Bütün reanimasiya tədbirləri həyata keçirilsə də, xəstəni xilas etmək mümkün olmayıb, fevralın 20-si saat 10:20 radələrində bioloji ölüm baş verib.
Hadisədən təxminən 1 saat sonra Cəlilabad Müalicə Diaqnostika Mərkəzinin nəzdində olan Ailə Sağlamlıq Mərkəzinin 1-ci mərtəbəsinin tavanında 2 metrlik kabelin izolyasiyası pozulub, tüstülənmə baş verib. Sözügedən hissədə tavan sökülüb, enerji xətlərinin dəyişilməsinə başlanılıb. Baş verən hadisə Mərkəzin fəaliyyətinə maneə törətməyib. Hadisə nəticəsində xəsarət alan olmayıb, eləcə də tibb müəssisəsində olan heç bir avadanlığa zərər dəyməyib.
Hazırda hadisənin baş vermə səbəbləri araşdırılır.