Cəlilabadda qohumlar arasında qan töküldü | Dəhşətli təfərrüatlar

Cəlilabadın Mikayıllı kəndində yaxın qohumlar arasında baş verən mübahisə zamanı odlu silahdan istifadə edilib.

Belə ki, kənd sakinləri Cavid Abdıyev və onun qohumu Məhəmməd Abdullayev mal-qaranın həyətyanı sahəyə keçməsinə görə mübahisə ediblər. Cavid bu barədə öz qohumuna irad bildirib. Mübahisə gecə saatlarında yenidən davam edib. Bu zaman Məhəmməd Abdullayev ov tüfəngi ilə Cavid Abdıyevi yaralayıb.

Güllə xəsarətləri alan şəxsin son durumu ilə bağlı Cəlilabad Rayon Mərkəzi Xəstəxanasından bildirilib ki, 1991-ci il təvəllüdlü C.Abdiyev xəstəxananın Təcili Yardım şöbəsinə hospitalizasiya olunub. Ona hər iki aşağı ətrafda çoxsaylı seçmə yaraları diaqnozu təyin edilib. Xəsarət alan şəxsə cərrahi müdaxilə olunub, hazırda vəziyyəti stabildir.

Daxili İşlər Nazirliyindən verilən məlumata görə, polis əməkdaşlarının keçirdikləri tədbirlərlə C.Abdiyevə ov tüfəngi ilə xəsarət yetirməkdə şübhəli bilinən həmkəndlisi M.Abdullayev müəyyən edilərək saxlanılıb. Faktla bağlı araşdırma davam etdirilir.