Diqqət: Bu şirkət rəhbərləri dələduzluqla məşğuldur - Baku TV

Xarici ölkələrdə işlə təmin edilməsi barədə yalan vədlər verərək vətəndaşların külli miqdarda pulunu ələ keçirməkdə təqsirləndirilən şirkət rəhbərlərinin cinayət işi üzrə məhkəmə araşdırması başlayıb.

Bakı Ağır Cinayətlər Məhkəməsinin hakimi Fəxri Məmmədovun sədrliyi ilə keçirilən prosesdə təqsirləndirilən şəxslərə ittiham aktı elan olunub. Onlar özlərini ittihamla təqsirli bilməyiblər. Məhkəmənin növbəti prosesi aprelin 7-nə təyin edilib.

Qeyd edək ki, xarici ölkələrdə işlə təmin edilməsi barədə yalan vədlər verərək çoxsaylı vətəndaşın müxtəlif məbləğlərdə pul vəsaitini ələ keçirən "365TOURISM", "TEMPOTIRPS" və "JOBS" Məhdud Məsuliyyətli Cəmiyyətlərinin vəzifəli şəxslərinin qanunsuz əməlləri barədə Baş prokuror yanında Korrupsiyaya qarşı Mübarizə Baş İdarəsində cinayət işi başlanılaraq istintaq aparılıb.

Adıçəkilən şirkətlərin rəhbərləri – müvafiq olaraq Ruslan Nəcəfov, Sədaqət Təhməzova və Mehrab Xəlilov 71 şəxsin ümumilikdə 223 min manatdan artıq pulunu ələ keçirərək dələduzluq etməkdə təqsirləndirilirlər.

Toplanmış sübutlar əsasında Ruslan Nəcəfov və Mehrab Xəlilov barəsində məhkəmənin qərarı ilə həbs, Sədaqət Təhməzova barəsində isə polisin nəzarəti altına vermə növündə qətimkan tədbiri seçilib.

Əlavə edək ki, istintaq dövründə iş üzrə zərərçəkən şəxslərə dəyən 223 min manat maddi ziyanın 105 min manatının ödənilməsi təmin edilib.