Dostundan maşın oğurlayıb başına oyun açdı? - "Üstünə rus nömrəsi vurub ki..." - Baku TV

Lizinq yolu ilə satılan avtomobil sonradan mübahisə predmetinə çevrilib.

Belə ki, “Massi” MMC tərəfindən Elvin Hüseynliyə təqdim edilən nəqliyyat vasitəsi üzrə bir müddət ödənişlər həyata keçirilsə də, sonradan köçürmələr dayandırılıb. Müştəri isə avtomobilinin oğurlandığını iddia edib. Lakin şirkətin apardığı araşdırma zamanı məlum olub ki, sözügedən avtomobil hazırda Elvin Hüseynlinin dostu Alim Şükürovun istifadəsindədir.

İddialara görə, nəqliyyat vasitəsinin GPS izləmə cihazı sökülüb, dövlət qeydiyyat nişanları isə dəyişdirilərək saxta nömrə ilə istifadə olunur.

“Massi” MMC-nin əməkdaşı Aytac Qafarova bildirib ki, 2025-ci il aprelin 15-də Elvin Hüseynliyə “Malibu” markalı avtomobil satılıb:

“Daha sonra noyabr ayına qədər müştəri ödənişləri vaxtında edib. Lakin noyabrda gecikmə yarandı və bu səbəbdən kredit şöbəmiz həmin şəxslə əlaqə saxladı. O isə bildirdi ki, avtomobil dostu tərəfindən oğurlanıb. Biz həmin şəxsi axtarmağa davam etdik və onun Lənkəranda yaşadığını müəyyən etdik. O, əvvəlcə avtomobilin onda olmadığını desə də, GPS məlumatları əsasında nəqliyyat vasitəsinin yerləşdiyi ərazi və cihazın söküldüyü yer müəyyən olundu. Daha sonra həmin şəxs bizə 5 min manat müqabilində avtomobili qaytara biləcəyini, əks halda isə özünə zərər yetirəcəyini, hətta avtomobili yandıracağını bildirdi.

Biz prokurorluğa müraciət etdikdən sonra Elvin Hüseynli bizimlə əlaqə saxlayaraq avtomobili tapdığını dedi. Bildirdi ki, nəqliyyat vasitəsi Lənkərandadır və üzərinə saxta, guya Rusiya qeydiyyat nişanı vurularaq idarə olunur”.

Qeyd edək ki, faktla bağlı hüquq-mühafizə orqanları tərəfindən araşdırma aparılır.