Dostunu ölümə göndərən kikboksçu qız - SONUNCU ŞAHİD

Kikbokçu qıza görə kafedə qətl törədilib.

Belə ki, Rəhimə İsmayılova (ad, soyad şərtidir) uzun müddət arzusunda olduğu idman zalını icarəyə götürür. Rəhimə fəaliyyətə başladığı ilk günlərin birində məşqdən sonra zalın yuyunma otağına keçib, suyun gəlmədiyini görür və əsəbiləşərək zalın sahibi Nicata zəng edir. Nicat tələsik halda bütün işlərini kənara qoyub zala gəlir. Su sayğacını və su borularını yoxladıqdan sonra problemi aradan qaldırır. Bununla da Rəhiməyə sübut edir ki, böyüdüləcək məsələ yoxdur.

Rəhimə və Nicatın arasında yaşanan anlaşılmazlıq daha sonra mübahisəyə çevrilir. Nicat isə Rəhiməyə bir də onu narahat etməməsini deyir. Həmin gün Rəhimə dostu Xaliqlə görüşərkən olanları ona danışır. Xaliq isə bir daha belə hal baş verəcəyi halda ona bu barədə məlumat verməsini tapşırır.

Daha sonra Rəhimə Nicata mesaj yazaraq su kranında sızma olduğunu və problemin davam etdiyini bildirir. Nicat isə əsəbiləşərək onu zaldan çıxarmaqla hədələyir. Onların arasında qeyri-etik söz savaşı başlayır və mübahisə böyüyür.

Ardınca Rəhimə Xaliqlə görüşərək baş verənləri ona danışır. Xaliq isə Nicatla söhbət etmək qərarına gəlir. Onlar kafelərdən birində görüşür və aralarında mübahisə yaranır. Xaliq belində gizlətdiyi silahı çıxararaq ona tərəf doğruldarkən Nicat əlinə vuraraq tapançanı yerə salır. Daha sonra silahı götürərək, Xaliqə ard-arda atəş açır. Aldığı güllə yaralarından Xaliq yerindəcə həyatını itirir.