Dövlət qeydiyyat nişanlarına qənim kəsilənlər | Qazaxıstan nömrəsi ilə pul tələb edənlər

Polis Nərimanov, Abşeron və Suraxanı rayonlarında avtomobillərdən dövlət qeydiyyat nişanlarını oğurlayan şəxsləri müəyyən edərək saxlayıb.

Manşet.az xəbər verir ki, Nərimanov rayonu ərazisində iki avtomobilin dövlət qeydiyyat nişanlarının oğurlanması barədə Nərimanov Rayon Polis İdarəsinin 18-ci Polis Şöbəsinə məlumat daxil olub. Keçirilən tədbirlər nəticəsində oğurluq əməllərini törətməkdə şübhəli bilinən beş şəxs saxlanılıb.

Saxlanılan şəxslər oğurladıqları dövlət qeydiyyat nişanlarının sahiblərinə Qazaxıstan Respublikasına məxsus nömrələrlə zəng edərək pul tələb ediblər. Onların Abşeron rayonu Xırdalan şəhəri ərazisində "Toyota", "Hyundai", "Range Rover" və "Mercedes-Benz" markalı daha beş avtomobilin dövlət qeydiyyat nişanlarını oğurladıqları məlum olub.

Suraxanı Rayon Polis İdarəsinin 33-cü Polis Bölməsi əməkdaşlarının keçirdikləri tədbirlər nəticəsində isə Yeni Günəşli qəsəbəsi "AB" yaşayış sahəsində yerləşən avtomobil təmiri sexində "Opel" markalı avtomobilin dövlət qeydiyyat nişanlarını oğurlamaqda şübhəli bilinən 24 yaşlı şəxs saxlanılıb. Saxlanılan şəxs "Limonçik" ləqəbi ilə tanınır. O, bir müddət əvvəl Rusiyada limon satmaqla sosial şəbəkələrdə məşhurlaşıb.

Faktlarla bağlı araşdırmalar aparılır.