DTX-dən təcili əməliyyat | Ekstremist qruplaşma ifşa edildi

Təxribat və girovgötürmə cinayətlərini planlaşdıran ekstremist qruplaşma ifşa edilib.

Bu barədə Dövlət Təhlükəsizliyi Xidmətindən məlumat verilib.

Bildirilib ki, həyata keçirilən kompleks əməliyyat-istintaq tədbirləri ilə Azərbaycan vətəndaşları – 1984-cü il təvəllüdlü Fəxrəddin Şahmurov, 1960-cı il təvəllüdlü Calal Muradov, 1998-ci il təvəllüdlü Kamran Babayev və digərlərinin Azərbaycan Respublikasının Konstitusiya quruluşunun əsasları əleyhinə ağır və xüsusilə ağır cinayət əməlləri törətmək məqsədilə sövdələşib cinayətkar birlik yaratmaları, respublika ərazisində gizli görüşlər və sosial şəbəkələrdə müxtəlif qapalı qruplar təşkil edərək dövlət təsisatlarına qarşı təxribat əməlləri törətməyə hazırlıq görmələri təsbit edilib.

Müəyyənləşdirilib ki, xarici ölkə vətəndaşının da iştirakı ilə təşkil olunmuş gizli toplantıda cinayətkar birliyin bayrağının hazırlandığı bəyan edilərək, birliyin məqsədləri naminə törədiləcək cinayətlərin plan və şərtlərinin işlənib-hazırlanmasına rəhbərlik etmək üçün Fəxrəddin Şahmurova təqdim edilib.

Fəxrəddin Şahmurov cinayət qruplaşmasının digər üzvləri ilə birlikdə mütəşəkkil dəstə halında ölkənin müdafiə qabiliyyətinə və iqtisadi təhlükəsizliyinə ziyan vurmaq məqsədilə dövlət sərhədində yerləşən gömrük postunu ələ keçirmək, cinayətkar birliyin tələblərini irəli sürmək üçün orada xidmət aparan əməkdaşları və digər şəxsləri girov götürmək barədə təxribat planı hazırlayıb. Görülən tədbirlərlə mütəşəkkil dəstənin qanunsuz əməllərinin qarşısı alınıb.

Fəxrəddin Şahmurov Cinayət Məcəlləsinin mütəşəkkil dəstə tərəfindən təxribata hazırlıq, adamları girov götürməyə hazırlıq, cinayət birlik (təşkilat) yaratma və dövlət əleyhinə çağırışlar məzmunlu materiallar yayma, Calal Muradov və Kamran Babayev isə Cinayət Məcəlləsinin 281.2-ci və digər maddələri ilə cinayət məsuliyyətinə cəlb edilərək həbs olunublar, həmçinin digər şəxslər istintaqa cəlb ediliblər.

Hazırda cinayət işi üzrə kompleks araşdırmalar davam etdirilir.