DTX mənzillərin videokamera görüntülərini ələ keçirərək yayan şəbəkəni ifşa etdi

Azərbaycan ərazisində yerləşən müxtəlif ofislərdə və mənzillərdə quraşdırılan videomüşahidə kameralarının idarəetmə qurğularına qlobal internet şəbəkəsi üzərindən məsafədən icazəsiz qoşularaq bu mənzillərdə yaşayan sakinlərin şəxsi və ailə həyatının sirrini təşkil edən məlumatları əks etdirən videomaterialları ələ keçirməklə xarici internet informasiya resurslarına yerləşdirilməsini ehtiva edən qanunazid əməllərlə bağlı əməliyyat-texniki tədbirlər həyata keçirilib.

Bu barədə Dövlət Təhlükəsizliyi Ximdəti məlumat yayıb.

Bildirilib ki, aparılan araşdırmalarla həmçinin Azərbaycanda müxtəlif ünvanlarda olan videomüşahidə kameralarının görüntülərinin real vaxt rejimində izlənilməsi imkanına malik istifadəçi hesablarının satışa çıxarıldığı da müəyyən olunub.

“Faktla əlaqədar DTX tərəfindən aidiyyəti dövlət qurumları ilə birgə kibermüdaxilə hallarının zərərli nəticələrinin aradan qaldırılması təmin edilib.

Görülən təxirəsalınmaz tədbirlərlə kibermüdaxiləyə məruz qalan müşahidə kameralarının yerləşdiyi ünvanlar təsbit edilib, bu cihazlara keçirilən texniki baxış zamanı ümumi təhlükəsizlik boşluğu aşkarlanıb və həmin boşluğun kibermüdaxilənin əsas faktoru olduğu müəyyənləşdirilib.

Eyni zamanda qeyd olunan təhlükəsizlik boşluğunun aradan qaldırılması aidiyyəti xarici istehsalçı şirkətdən tələb edilib, habelə kibermüdaxiləyə məruz qalan kameraların videogörüntülərinin xarici internet informasiya ehtiyatlarından silinməsi təmin olunub”, ‒ deyə DTX-nin məlumatında qeyd olunub.