Erkən evliliyin qurbanı olan ana uşağından imtina etdi - Baku TV

Mehdiabad ərazisində baxımsız vəziyyətdə tapılan azyaşlı uşaq polis əməkdaşları tərəfindən sığınacağa yerləşdirilib.

Hadisə ilə bağlı “Azərbaycan Uşaqları” İctimai Birliyinin sədri Kəmalə Ağazadə bildirib ki, uşaq təxminən iki gün əvvəl Fatmayı qəbiristanlığı yaxınlığında, məscid ətrafında aşkarlanıb:

“Qadın rəsmi şəkildə, notarial qaydada uşağından imtina etdiyini bildirib. Uşaq artıq bütün tibbi müayinələrdən keçirilib. Onun doğum haqqında şəhadətnaməsi var”.

K.Ağazadə qeyd edib ki, uşağın anası erkən evliliyin qurbanıdır və sosial vəziyyəti ağır olub:

“Ananın 20 yaşı tamam olmayıb. Məlumata görə, bu uşaqdan başqa bir övladı da 6 aylıq olarkən dünyasını dəyişib. Ana bildirib ki, uşağı tez-tez evdə tək qoyaraq işləməyə gedirmiş. Onlar kirayədə müxtəlif ünvanlarda yaşayıb və davranışlarına görə yaşayış yerlərini tez-tez dəyişiblər”.

Onun sözlərinə görə, uşaq tapılan zaman ağır vəziyyətdə olub:

“Uşaq bizə gətiriləndə çox baxımsız halda idi. Hətta geyimlərini polis əməkdaşları təmin edib. Göz kontaktı qurmur, adına reaksiya verməsi üçün bir neçə dəfə səsləmək lazım olur”.

Qeyd edək ki, hazırda Sosial Xidmətlər Agentliyi tərəfindən uşağın vəziyyəti qiymətləndirilir. Müvafiq müayinələr başa çatdıqdan sonra onun mənafeyinə uyğun olaraq sosial qayğı ilə təmin edilməsi istiqamətində addımlar atılacaq.