Ev quşları niyə kütləvi şəkildə tələf olur? | İsmayıllı sakinləri çarəsiz vəziyyətdə

İsmayıllı rayonunun Topçu kəndində ev quşları arasında xəstəlik yayılıb.

Sakinlərin sözlərinə görə, son günlər fərdi təsərrüfatlarında olan ev quşları kütləvi şəkildə tələf olur.

Onlar bildiriblər ki, xəstəliyə yoluxan quşları fərdi qaydada müalicə etmələrinə baxmayaraq, tələfatın qarşısını ala bilməyiblər.

“Xəstəlik səbəbindən 50 çolpam, 10 hindtoyuğum ölüb. Sağ qalanlar köhnə toyuqlardır, təzələrin hamısı tələf olub”, – deyə kənd sakini Afət Vəliyeva söyləyib.

Azərbaycan Respublikasının Qida Təhlükəsizliyi Agentliyinin (AQTA) müvafiq regional bölməsi tərəfindən Topçu kəndindəki mövcud durum nəzarətə götürülüb.

“İlkin əldə olunan nəticələr ondan ibarətdir ki, kənddə bütövlükdə xüsusi infeksion xəstəlik əlamətləri yoxdur. Ancaq tələf olmuş quşlardan və təsərrüfatın digər hissələrindən diaqnostik nümunələr götürülərək Qida Təhlükəsizliyi Agentliyinin müvafiq laboratoriyalarına təqdim olunub. Laboratoriya müayinələrinin nəticələri başa çatdıqdan sonra tələfatın səbəbi barəsində əlavə məlumat veriləcək”, – deyə AQTA-nın şöbə müdiri Qalib Əbdüləliyev bildirib.