Evləri külə dönən sakinlərin fəryadı | Çöldə qalmışıq, gedəcək yerimiz yoxdur

Kürdəmirin Şahsevən kəndində fərdi yaşayış evi yanıb.

Kənd sakini 58 yaşlı Xəlil Baxşıyevə məxsus ümumi sahəsi 120 kvadratmetr olan üçotaqlı ev əşyaları ilə birgə külə dönüb.

Hadisə yerinə Fövqəladə Hallar Nazirliyinin Kürdəmir Yanğından Mühafizə Hissəsinin texnikası və canlı qüvvəsi cəlb olunub. Yanğın söndürülüb və yaxınlıqdakı tikililər yanğından mühafizə olunub.

“Yanğını söndürməyə çalışsaq da, bacarmadıq. Yanğınsöndürənlər gələnə qədər ev yanıb külə döndü. 70 min manata yaxın məbləğdə ziyan dəyib. Evdəki əşyaların, sənədlərin hamısı yanıb”, – deyə zərəçəkən X.Baxşıyev bildirib.

Hadisə barədə danışan digər zərərçəkən Tərgül Baxşıyeva yanığının mətbəxdə başladığını deyib:

“Qapını açan kimi alov üzümə vurdu. Vedrədəki suyu üzərinə tökdüm ki, söndürüm. Amma heç nə edə bilmədim. Evdən bir şey çıxara bilmədik. Çöldə qalmışıq, gedəcək yerimiz yoxdur”.