Əvvəl stəkanla iş yoldaşını öldürdü, sonra... | Bakıda tükürpərdən hadisə

İş yoldaşını stəkanla vuraraq qətlə yetirməkdə təqsirləndirilən Möhsün Abdullayevin cinayət işi üzrə məhkəmə prosesi keçirilib.

Bakı Ağır Cinayətlər Məhkəməsində hakim Elnur Nuriyevin sədrliyi ilə keçirilən iclasda zərərçəkən Bahadur Tağıyevin həyat yoldaşı ifadə verib.

O, təqsirləndiriləni tanımadığını deyərək həyat yoldaşını itirdikdən sonra ailəsinin həm maddi, həm də mənəvi cəhətdən pis vəziyyətə düşdüyünü məhkəmə heyətinin diqqətinə çatdırıb.

Məhkəmədə şahid kimi ifadə verən təqsirləndirilənin iş yoldaşlarının sözlərinə görə, Bahaduru müəssisənin həyətində, konteynerin yaxınlığında başı qan içində, lakin sağ vəziyyətdə görüblər. Onlar Bahadurla maraqlandıqda o, yıxıldığını bildirib. Daha sonra hadisə barədə təcili tibbi yardıma məlumat verilib. Həkimlər yarım saatdan sonra hadisə yerinə çatsalar da, o artıq dünyasını dəyişib.

İstintaq materiallarına əsasən, Möhsün Abdullayev və Bahadur Tağıyev çay içərkən mübahisə ediblər. Bu zaman Möhsün əlindəki stəkanla Bahadurun başına bir neçə zərbə endirib, daha sonra yumruq və təpiklə vurmağa davam edib. B.Tağıyev aldığı xəsarətlərdən müəssisənin həyətində dünyasını dəyişib.

Qeyd edək ki, 55 yaşlı Möhsün Abdullayev 1997-ci ildə zorlama cinayətinə görə 8 il məhkum olunub. Bu dəfə isə iş yoldaşını qəsdən öldürməkdə təqsirləndirilir. Onun barəsində Cinayət Məcəlləsinin 120.1-ci (qəsdən adam öldürmə) maddəsi ilə cinayət işi açılıb.

Xatırladaq ki, növbəti məhkəmə prosesi oktyabrın 24-nə təyin edilib.