FHN Cəlilabaddakı mebel sexi ilə bağlı hərəkətə keçdi | Obyektdə hansı qaydalar pozulub?

Fövqəladə Hallar Nazirliyinin Dövlət Yanğın Nəzarəti Xidməti Cəlilabad rayonu, Qarazəncir kəndində yerləşən mebel fabrikində keçirilən yoxlama zamanı yanğın təhlükəsizliyi sahəsində çoxsaylı nöqsanların mövcud olduğunu aşkarlayıb.

Həmin nöqsanların insan həyatı və sağlamlığına, ətraf mühitə, dövlətin əmlak maraqlarına birbaşa təhlükə yaratdığı müəyyən edilib.

Məlum olub ki, elektrik təsərrüfatı tələblərə uyğun quraşdırılmayıb. Obyekt daxili yanğın kranları ilə təmin olunmayıb. Taxta konstruksiyalara odadavamlı məhlul hopdurulmayıb. Obyektin əsaslı təmiri, yenidən qurulması və genişləndirilməsi zamanı tikinti layihə sənədləri, eləcə də istismarı Dövlət Yanğın Nəzarəti Xidməti ilə razılaşdırılmayıb.

Sadalananlarla yanaşı, digər qeydə alınan nöqsanlar əsasında müəssisənin sahibinə bildirilib ki, obyektin bu formada fəaliyyət göstərməsi hər an baş verə biləcək yanğının qısa müddətdə genişlənməsini qaçılmaz edəcək. Bu səbəbdən mebel fabrikinin istehsal sexinin istismarı dayandırlıb.