FİFA 2022-ci ilin ən yaxşılarını açıqladı

FİFA ötən il üzrə ən yaxşıların adlarını açıqlayıb. Parisdə təşkil olunan mükafatlandırılma mərasimində 9 nominasiyada qaliblər müəyyənləşib.

Səsvermənin nəticələrinə əsasən, Argentina millisi ilə dünya çempionu olan Lionel Messi ən yaxşı futbolçu adına yiyələnib. Leo PSJ-nin daha bir ulduzu Kilian Mbappeni 8, “Real”ın kapitanı Kərim Benzemanı isə 18 xal qabaqlayıb.

Ən yaxşı qolkiperlərin mübarizəsində də Argentina təmsilçisi 1-ci olub. Qətərdəki mundialda öz oyunu ilə futbolsevərlərin rəğbətini qazanan Emiliano Martines Mərakeş seçməsinin üzvü Yassin Bunu və Belçika komandasının qapıçısı Tibo Kurtuanı geridə qoyaraq mükafatın sahibi olub. Bundan başqa, Argentina seçməsinin çalışdırıcısı Lionel Skaloni ən yaxşı baş məşqçi, argentinalı azarkeşlər isə ən yaxşı fanatlar nominasiyasında qalib olublar.

Qadınlar arasında qaliblərə gəldikdə, “Barselona”nın üzvü Aleksiya Putelyas futbolçular, “Mançester Yunayted”in oyunçusu Meri İrps qapıçılar, İngiltərə millisinin çalışdırıcısı Sarina Viqman isə məşqçilər arasında “The Best” mükafatına layiq görülüb.