Gəncə sakini keçmiş həyat yoldaşını amansızlıqla qətlə yetirdi

Səhər saatlarında Gəncə şəhərinin 3-cü mikrorayon, ev 9 ünvanındakı binanın 1-ci girişində meyit olması barədə polisə məlumat daxil olur.

Hadisə yerinə gələn əməliyyatçılar binanın üçüncü mərtəbəsindəki pilləkanlarda bütün bədəni qana bulaşmış və qarnına bıçaq sancılmış vəziyyətdə qadın cəsədi ilə qarşılaşıblar.

Müəyyən olunur ki, qətlə yetirilən şəxs həmin binada yaşayan Bayramova Aytən Adil qızıdır. Bu ərəfədə istintaq qrupuna qətli törədən şəxsin polisə könüllü təslim olması barədə məlumat daxil olur. Onun Aytən Bayramovadan bir neçə ay əvvəl rəsmi boşanan keçmiş həyat yoldaşı Elxan Cəfərov olduğu bildirilir.

Saxlanılan şəxs ifadəsində keçmiş həyat yoldaşını qısqanclıq zəminində qətlə yetirdiyini etiraf edir. Bildirir ki, hadisə baş verən gün əslində Aytəni öldürmək fikri olmayıb. Sadəcə onu izlədiyi zaman şahidi olduqlarına görə xəbərdar etmək üçün qadının yaşadığı ünvana gəlib. Aralarında yaranan mübahisədən sonra Elxan keçmiş həyat yoldaşı Aytəni 17 bıçaq zərbəsi ilə qətlə yetirir.

Elxan Cəfərov bundan sonra hadisə yerini tərk edərək bazara, anasının işlədiyi yerə gəlib ona belə bir qətl törətdiyini bildirir. Könüllü olaraq bazarın sahə müvəkkilinə yaxınlaşır və törətdiyi cinayəti etiraf edir.

Gəncə Ağır Cinayətlər Məhkəməsinin hökmü ilə Elxan Cəfərov 18 il 6 ay müddətinə azadlıqdan məhrum edilib.