Gəncədə doğuş üçün xəstəxanaya gətirilən ana dünyasını dəyişdi

Gəncədə ana ölümü baş verib.

Martın 27-də Perinatal Mərkəzdə qeysəriyyə əməliyyatı ilə uşaq dünyaya gətirən Tərtər sakini, 31 yaşlı Günel Həsənova aprelin 1-də Abbas Səhhət adına Xəstəxananın Reanimasiya şöbəsində həyatını itirib.

“Bizə dedilər ki, hər şey yaxşıdır. Sonra bizim xəbərimiz olmadan qızımın daxili orqanlarını pis günə qoydular. Başqa yerə aparmaq istəyəndə bizi aldatdılar ki, narahat olmayın, xəstəniz yaxşı olacaq”, – mərhumun atası deyib.

İlk hamiləliyi olan Günel Həsənova 1 kiloqram 300 qram çəkidə qız uşağı dünyaya gətirib. Bir gün sonra – martın 28-də halı pisləşən ana yenidən əməliyyat olunub. Həkimlərin səylərinə baxmayaraq, kəskin ürək-ağciyər çatışmazlığı diaqnozu ilə ölüm qeydə alınıb.

Qadının dünyaya gətirdiyi uşağın vəziyyətinin ağır olduğu bildirilir. Körpə süni tənəffüs aparatına qoşulub, yenidoğulmuşların intensiv terapiya şöbəsində müalicə alır.