Gəncədə evdə başlayan yanğın qonşuya keçdi | Zərərçəkən hər şeyi danışdı

Gəncədə fərdi yaşayış evində yanğın baş verib.

Vüqar İsmayılova məxsus ümumi sahəsi 40 kvadratmetr olan köməkçi tikilinin yanar konstruksiyaları və dama yığılmış köhnə ev əşyaları yanıb.

“Əlimi yumaq üçün çölə çıxanda gördüm ki, ev alışıb yanır. Hadisənin hansı səbəbdən baş verdiyini bilmirəm. Beş uşağım var, ailə durumum ağırdır. Xahiş edirəm ki, vəziyyətlə əlaqədar ölçü götürülsün”, – deyə ev sahibi Günay İsmayılova bildirib.

Yanğın Fidan Əkbərovaya məxsus yaxınlıqdakı evə də keçib və burada ümumi sahəsi 100 kvadratmetr olan evin yanar konstruksiyaları 10 kvadratmetr sahədə yanıb.

Əraziyə Fövqəladə Hallar Nazirliyinin iki yanğınsöndürən avtomobili və briqadası cəlb olunub. Alov yanğınsöndürənlər tərəfindən söndürülüb və daha geniş əraziyə yayılmasının qarşısı alınıb. Hadisə zamanı xəsarətalan olmayıb. Yanğının başvermə səbəbləri araşdırılır.