Gəncədə faciə ilə bitən davanın detalları | Ölən və yaralananlar var

Gəncədə tanışlar arasında baş verən insident ölümlə nəticələnib.

Hadisə aprelin 28-i axşam saatlarında şəhərin mərkəzi hissələrindən birində qeydə alınıb.

Belə ki, ərazidə yerləşən iaşə obyektlərinin birində söhbət edən üç nəfər arasında başlayan mübahisə nəticəsində iki nəfər ağır bıçaq xəsarətləri alıb.

Onlar dərhal Gəncə Şəhər Birləşmiş Xəstəxanasının nəzdində olan Akademik Zülfüqar Məmmədov adına xəstəxananın Təcili tibbi yardım şöbəsinə hospitalizasiya olunublar.

Döş qəfəsinin sağ tərəfinin daxilə keçən hissəsinin kəsilmiş-deşilmiş yarası, divar aralığının yaralanması diaqnozu təyin edilən 1995-ci il təvəllüdlü Eyyub Talıbov reanimasiya tədbirlərinə baxmayaraq, ölüm faktı qeydə alınıb.

Digər yaralı 31 yaşlı Osman Nağıyevin müalicəsi davam etdirilir.

Həyatını itirən şəxsi qətlə yetirməkdə təqsirləndirilən 29 yaşlı Alim Quliyev polis əməkdaşları tərəfindən saxlanılaraq istintaqa təhvil verilib.

Faktla bağlı cinayət işi açılıb, araşdırma aparılır.