Gəncədə şəxsi münasibətlər zəminində Kəlbəcər sakini qətlə yetirildi

Gəncədə Kəlbəcər sakinləri arasında baş verən insident ölümlə nəticələnib.

Qonşulardan biri digərinin ov tüfəngindən açdığı atəş nəticəsində həyatını itirib.

Məlumata görə, 43 yaşlı Hikmət Mamedov qonşusu Bəxtiyar Heydərovu yaşadıqları qəsəbənin yaxınlığına, Nizami Gəncəvi Məqbərəsi ətrafındakı yaşıllıq əraziyə çağırıb. Bəxtiyar görüş yerinə çatan zaman onu daha 2 nəfərlə gözləyən Hikmət ov tüfəngindən atəş açıb, daha sonra avtomobilə minərək ərazini tərk edib.

Yaralı çətinliklə yaxınlıqdakı magistrala çıxıb, bu zaman yoldan keçən, içərisində ailə olan avtomobillərdən biri ona kömək edib. Ailə yaralını Gəncə Şəhər Abbas Səhhət adına xəstəxananın Təcili Tibbi Yardım şöbəsinə çatdırıb. Həkimlərin səyinə baxmayaraq, Bəxtiyar Heydərovun həyatını xilas etmək mümkün olmayıb.

Məlumata görə, həmyaşıd qonşular bu hadisəyə qədər yaxşı münasibətdə olublar.

Daha əvvəl də məhkumluğu olan Hikmət Mamedov polis əməkdaşları tərəfindən saxlanılaraq istintaqa təhvil verilib.

Cinayət işi ilə bağlı araşdırmalar davam etdirilir.