Goranboyda qandonduran qətl | Ata oğlunun ölümündə şübhəli bilinir - Baku TV

Goranboyda 33 yaşlı kişi qətlə yetirilib.

Dəhşətli hadisə avqustun 2-də gecə saatlarında rayon ərazisində yerləşən fərdi yaşayış evlərindən birində baş verib.

İlkin məlumata görə, 33 yaşlı Elvin Aslanovun qətlə yetirilməsində atası, 57 yaşlı Şahin Aslanov şübhəli bilinir.

Bildirilir ki, hadisədən əvvəl ailə daxilində mübahisə yaşanıb. İddiaya görə, Şahin Aslanov həyat yoldaşını döyüb, daha sonra isə bıçaqla ona hücum etməyə cəhd göstərib. Bu zaman oğlu Elvin Aslanov valideynlərini sakitləşdirmək istəyib. Nəticədə, ata oğluna bıçaq zərbəsi endirib. Aldığı xəsarətlərdən Elvin Aslanov hadisə yerində həyatını itirib.

Qətlə yetirilən Elvin Aslanovun Goranboy rayonunda fitnes müəllimi kimi çalışdığı bildirilir.

Polis əməkdaşlarının keçirdiyi əməliyyat-axtarış tədbirləri nəticəsində hadisəni törətməkdə şübhəli bilinən Şahin Aslanov saxlanılaraq istintaqa təhvil verilib.

Faktla bağlı Goranboy Rayon Prokurorluğunda araşdırma aparılır.