Gördüm qızım xırıldayır, gözündən... | Şirvanda ananın faciəvi ölümü

Oktyabrın 14-də Şirvan Doğum Evində qeysəriyyə yolu ilə uşaq dünyaya gətirən Səma Yusubova ayın 26-sı xəstəxananın Reanimasiya Şöbəsində dünyasını dəyişib.

S.Yusubovanın anası Sevda Yusubovanın sözlərinə görə, qızına qan vurulmadığı üçün dünyasını dəyişib:

“Övladımı ağrılarla xəstəxanaya gətirdim. Həkimə dedim ki, qızımın başına qan çatmır. Həkim isə bunun narkoz səbəbindən olduğunu dedi. Üç sistem yazdılar, evə apardıq. Sistemləri vurandan sonra qızımın halı pisləşdi. Gördüm ki, xırıldayır, gözündən yaş, ağzından köpük gəlir. Qışqırmağa başladım, qızım keçindi”.

Qeyd edək ki, 26 yaşlı Səma Yusubovanın ölümü ilə bağlı TƏBİB açıqlama yayıb. Bildirilib ki, 14 oktyabr tarixində Şirvanın Yeni qəsəbə sakini 1998-ci il təvəllüdlü Səma Yusubova Şirvan Şəhər Mərkəzi Xəstəxanasının Doğum Evinin Ginekologiya Şöbəsində qeysəriyyə əməliyyatı ilə doğuş həyata keçirib:

“Xəstə 19 oktyabrda vəziyyəti kafi olaraq körpə ilə birlikdə evə buraxılıb. Yaxınlarının bildirdiyinə görə, çiməndən sonra pasiyentdə kəskin baş ağrıları, bədən temperaturunun qalxması, ürəkbulanması olub. Ayın 25-də fasiləsiz qusma, kəskin baş ağrıları başlayıb, yaxınları tərəfindən xəstəxanaya gətirilib. Gecə xəstənin halı qəfil pisləşib. Bütün tədbirlərə baxmayaraq, 02:55 radələrində onun həyatını xilas etmək mümkün olmayıb”.

Faktla bağlı araşdırma aparılır.