Hacıqabul polisi əməliyyat keçirdi: narkokuryer saxlanıldı

Hacıqabul polisinin keçirdiyi əməliyyat zamanı narkokuryerlik etməkdə şübhəli bilinən Bakı şəhər sakini Cavid Mustafayev tutulub.

Onun üzərinə, eləcə də sərnişini olduğu avtomobilə baxış zamanı nəqliyyat vasitəsindən təmiz çəkisi 1 kiloqram 400 qram olan narkotik vasitə – heroin və 50 qrama yaxın psixotrop maddə aşkar edilərək götürülüb.

Dindirilmə zamanı Cavid Mustafayev bildirib ki, Azərbaycana qaçaqmalçılıq yolu ilə narkotik göndərən iranlı narkotacirlə sosial şəbəkələr vasitəsilə tanış olub və onun sifarişi ilə 1000 manat qarşılığında həmin narkotik vasitəni qabaqcadan təyin olunan yerə çatdırmalı imiş.

Hazırda faktla bağlı araşdırmalar davam etdirilir.