Həmyaşıdını qətlə yetirən məktəblidən etiraf | 1-2 nəfərlə getdik, sonra isə...

Bakıda 10-cu sinif şagirdi olan həmyaşıdını qətlə yetirməkdə təqsirləndirilən, yetkinlik yaşına çatmayan, şərti adı Emin Həzrətov olan şəxsin cinayət işi üzrə növbəti məhkəmə prosesi keçirilib.

Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi ilə baş tutan prosesdə təqsirləndirilən şəxs ifadə verib.

Emin Həzrətov ifadəsində bildirib ki, onlar arasında mübahisə "WhatsApp" qrupunda yaranıb. Onun sözlərinə görə, Elgün bir neçə nəfərlə məktəbin qarşısına gəlib. Daha sonra onlar mübahisəni aydınlaşdırmaq üçün qəbiristanlığa gediblər.

Orada yaranan mübahisə zamanı isə Emin Elgünün ayağına iki bıçaq zərbəsi vurub. Sonuncu çoxlu qan itirdiyindən onun həyatını xilas etmək mümkün olmayıb.

İş üzrə növbəti məhkəmə prosesi aprelin 14-nə təyin edilib. Rəsmi məlumata görə, hadisə oktyabrın 2-də Bakının Sabunçu rayonu ərazisində baş verib.

Belə ki, 2008-ci il təvəllüdlü Elgün Qurbanovun kəsici alətlə qətlə yetirilməsi barədə polisə məlumat daxil olub.

Keçirilən tədbirlərlə cinayət əməlini törətməkdə şübhəli bilinən onun həmyaşıdı Emin Həzrətov saxlanılıb. O, Cinayət Məcəlləsinin 126.3-cü (qəsdən sağlamlığa ağır zərərvurma ehtiyatsızlıqdan zərərçəkmiş şəxsin ölümünə səbəb olduqda) maddəsi ilə təqsirli bilinib.