Hərbçi qohumunu qətlə yetirən şəxs hakim qarşısında | Detallar açıqlandı

Bakıda xalası oğlunu qətlə yetirməkdə təqsirləndirilən Yusif İsmayılovun cinayət işi üzrə məhkəmə istintaqı yekunlaşıb.

Bakı Ağır Cinayətlər Məhkəməsinin hakimi Fəxri Məmmədovun sədrliyi ilə keçirilən prosesdə dövlət ittihamçısı Tural Yaqubov təqsirləndirilən şəxsin 18 il azadlıqdan məhrum edilməsini məhkəməyə təklif edib.

Zərərçəkənin hüquqi varisi isə öz növbəsində hakimdən oğlunun qətlində ittiham olunan Yusif İsmayılova daha ağır cəza verilməsini istəyib. Təqsirləndirilən şəxsin vəkili isə müdafiə çıxışı üçün məhkəmədən vaxt istəyib. Məhkəmənin yekun iclası sentyabrın 10-na təyin edilib.

Qeyd edək ki, hadisə 2024-cü ilin yanvarında paytaxtın Səbail rayonunda baş verib. 1993-cü il təvəllüdlü Yusif İsmayılov şəxsi münasibətlər zəminində xalası oğlu 1995-ci il təvəllüdlü Etibar Fətəliyevə bıçaqla xəsarət yetirərək onu qəsdən öldürüb. Yusif İsmayılov polis əməkdaşları tərəfindən saxlanılaraq istintaqa cəlb edilib. Ona qarşı Cinayət Məcəlləsinin xuliqanlıq niyyəti ilə qəsdən adam öldürmə maddəsi ilə ittiham irəli sürülüb.

Xatırladaq ki, Etibar Fətəliyev Azərbaycan Silahlı Qüvvələrinin baş leytenantı və 44 günlük Vətən müharibəsinin iştirakçısı olub. O, göstərdiyi şücaətlərə görə, “İgidliyə görə”, “Cəsur döyüşçü”, “Kəlbəcərin azad olunmasına görə” medalları ilə təltif olunub.