"Hesabı ödəyib, yuxarıda..." | Gecə klubunun əməkdaşı hadisə barədə nələri danışdı? - Baku TV
Yeniliklərdən dərhal xəbərdar olun
Bakının Nizami rayonunda, “Neftçilər” metro stansiyasının yaxınlığında insident baş verib. Hadisə gecə saatlarında qeydə alınıb.
Məlumata görə, gecə klubundan sərxoş vəziyyətdə çıxan gənc oğlan “Mercedes Gelandewagen” markalı avtomobilinə əyləşib. O, idarə etdiyi nəqliyyat vasitəsini yaxınlıqdakı qadın geyimləri mağazasının şüşə divarına çırpıb.
İddialara görə, gənc oğlan klubdan tanış olduğu qadınla birlikdə çıxıb. Bir müddət sonra onun sevgilisi hadisə yerinə gələrək onları birlikdə yaxalayıb. Bundan sonra tərəflər arasında insident yaşanıb.
Hadisə ilə bağlı danışan gecə klubunun əməkdaşı Əli İbrahimoğlu isə baş verənlərin obyektə aidiyyətinin olmadığını bildirib. Onun sözlərinə görə, müştərilər obyektə gəlib istirahət edib, hesabı ödədikdən sonra oradan ayrılıblar.
“Çöldə nə baş verməsindən bizim heç bir məlumatımız yoxdur. Həmin bəyin bura xanımla gəlib-gəlmədiyini bilmirəm. Biz müştəri seçmirik, hamısı bizim qonaqlarımızdır. Hüquq-mühafizə orqanlarının əməkdaşları hadisə ilə bağlı kamera görüntülərini götürüb, araşdırma aparıblar və şikayətçiləri dinləyiblər”, – deyə Ə.İbrahimoğlu sözlərinə əlavə edib.
