İcra hakimiyyətindəki qəbulda qalmaqal | Vəzifəli şəxs niyə həbs olundu?

Goranboy Rayon İcra Hakimiyyətində keçirilən qəbul zamanı xuliqanlıq etmiş vəzifəli şəxs həbs olunub.

“Qafqazinfo”nun verdiyi xəbərə görə, hadisə bir neçə gün əvvəl baş verib.

Belə ki, rayonun Su və Meliorasiya İdarəsində icraçı direktor vəzifəsində çalışan Qızılhacılı kənd sakini 63 yaşlı şəxs qəbul zamanı Rayon İcra Hakimiyyətinin rəhbərliyinin ünvanına təhqiramiz ifadələr işlətdiyinə və icra başçısının müavininə hücum etdiyinə görə polis tərəfindən saxlanılıb.

Barəsində İnzibati Xətalar Məcəlləsinin xırda xuliqanlıq maddəsi ilə protokol tərtib edilən vəzifəli şəxsin işi məhkəməyə göndərilib. O, ifadəsində bildirib ki, torpaq sahəsi icarəyə götürmək niyyəti olub və buna görə qəbula gedib.

“Özümü təqsirli bilirəm. Goranboy Rayonu Su və Meliorasiya İdarəsində icraçı direktor vəzifəsində işləyirəm. Həmin gün icra hakimiyyətində keçirilən vətəndaşların qəbulunda iştirak etmək üçün getmişdim. Məqsədim Qızılhacılı qəsəbə ərazisində xırdabuynuzlu heyvanların otarılması üçün torpaq sahəsi istəmək idi. İcra başçısının müavini mənə bu barədə izah verdi. Lakin mən əsəbiləşərək səs-küy salmağa və nalayiq ifadələr işlətməyə başladım”, – deyə təqsirləndirilən şəxs etiraf edib.

İcra başçısının müavini isə qeyd edib ki, təqsirləndirilən şəxsə digər vətəndaşlarla eyni münasibət göstərilib.

“O, ümumi örüş sahəsinin öz adına sənədləşdirilməsi ilə əlaqədar qanunsuz iddialar irəli sürüb. Bu zaman Goranboy Rayon İcra Hakimiyyəti rəhbərliyi tərəfindən həmin şəxsə qanuni izahlar verilməsinə baxmayaraq, qanunsuz tələblərini yenidən aqressiv şəkildə uca səslə deməyə başlayıb. Bir daha həmin şəxsə izah verilsə də, Goranboy Rayon İcra Hakimiyyəti rəhbərliyinin ünvanına uca səslə nalayiq ifadələr işlətməyə başlayıb. Hətta bununla kifayətlənməyərək məni vurmağa çalışıb. Bu səbəbdən həmin hadisənin şahidi olan şəxslərlə birgə akt tərtib edilib”, – deyə Goranboy Rayon İcra Hakimiyyəti başçısının müavini qeyd edib.

Goranboy Rayon Məhkəməsinin qərarı ilə rayonun Su və Meliorasiya İdarəsində icraçı direktor vəzifəsində çalışan təqsirləndirilən şəxs 6 sutkalıq həbs edilib.