İki məktəblinin ölümünün təfərrüatları

İmişlidə 2 məktəblinin ölümünün təfərrüatları məlum olub.

Dəhşətli hadisə aprelin 14-də İmişlidəki 5 saylı orta məktəbin ərazisində baş verib.

Məktəbin həyətində futbol oynamağa gedən 2 məktəbli – 14 yaşlı Amid İsbərov və Fərhan Məmmədzadə bir müddət futbol oynadıqdan sonra yaxınlığında olan yarımtikilinin damına çıxıblar. Dama çıxdıqdan sonra onlar yüksək gərginlikli elektrik naqillərinə toxunublar. Nəticədə hər iki yeniyetməni cərəyan vuraraq öldürüb.

Amid İsbərovun anası Yeganə Əliyeva Baku TV-yə hadisə haqqında danışıb. “Dostu ilə yuxarı qalxıb. Uşağın əlində telefon olub. Açan kimi elektrik cərəyanı onu vurub. Kömək etmək istəyəndə oğlumu da vurub”, – deyə məktəblinin anası söyləyib.

Qeyd edək ki, 14 yaşlı Amid İsbərov İmişlidə 2 saylı orta məktəbin 7-ci sinfində oxuyurmuş. Onunla birlikdə dünyasını dəyişən Fərhan Məmmədzadə isə paytaxt məktəblərindən birində təhsil alırmış. Amidlə dost olan Fərhan bayram tətili olduğu üçün rayona babasıgilə qonaq gəlibmiş. Baş vermiş hadisə ilə bağlı cinayət işi açılıb. Araşdırmalar davam etdirilir.