İldırım vuran məktəbdə yanğın baş verib

Zaqatalada məktəbdə yanğın baş verib. Hadisə rayonun Əliabad qəsəbəsindəki 4 saylı tam orta məktəbdə qeydə alınıb.

Ard-arda baş verən güclü şimşək və göy gurultusu zamanı məktəb binasını ildırım vurub. Dərhal sonra məktəbin dam örtüyündə güclü yanğın başlayıb.

Əraziyə Fövqəladə Hallar Nazirliyinin texnikaları və şəxsi heyəti cəlb olunub. Məktəbin dam örtüyündə baş verən yanğın sinif otaqlarına keçmədən söndürülüb.

Qeyd edək ki, üçmərtəbəli 360 şagird yerlik məktəb 2007-ci ildə istifadəyə verilib. Hazırda təhsil müəssisəsində 190 şagird təhsil alır.