İrandan narkotik keçirənlər tutuldu

İrandan Azərbaycana narkotik maddə keçirilməsinin qarşısı alınıb.

Belə ki, Beyləqanın Birinci Şahsevən kəndi yaxınlığında 2 nəfər naməlum şəxs dövlət sərhədini pozmağa cəhd edərkən Azərbaycan sərhədçiləri ilə qarşılaşıblar. Bu zaman onlar xəbərdarlıq atəşinə baxmayaraq, geriyə, İran ərazisinə qaçıblar. Həmin şəxslərin ərazidə atıb getdikləri 2 ədəd bağlamada 21 kiloqram 600 qram narkotik vasitə “marixuana” aşkar olunaraq götürülüb.

Füzulinin Birinci Mahmudlu kəndi yaxınlığında da 2 nəfər naməlum şəxsin dövlət sərhədini pozmağa cəhd etdiyi və geriyə, İran ərazisinə qaçması müşahidə edilib. Sərhəd naryadı təlimata uyğun olaraq onları yaxalamaq məqsədilə silah tətbiq edib və həmin şəxsi ayağından yaralayıb.

Saxlanılan şəxsin üzərindən 1 ədəd xəncər, 1 ədəd bıçaq, 1 ədəd bağlamada 6 kiloqram 400 qram çəkidə narkotik vasitə və psixotrop tərkibli həblər aşkar olunub. Araşdırma zamanı saxlanılan şəxslərin İranın Parsabad şəhər sakinləri Şeyxniya Əli Cəmşid oğlu və Əlipur Poya Qəşəm oğlu olduqları müəyyən edilib.

Bundan başqa, Beyləqanın İmamverdili kəndində keçirilən tədbirlərlə Bakı şəhər sakini Həsənova Solmaz Saləddin qızı saxlanılıb. Üzərinə baxış zamanı ondan 1 ədəd bağlamada ümumi çəkisi 15 kiloqram 100 qram olan narkotik vasitə aşkar olunaraq götürülüb.

Hər 3 fakt üzrə əməliyyаt-istintaq tədbirləri dаvаm еtdirilir.