İsmayıllı - Lahıc yolu açıldı? | Təhlükəli ərazi barədə xəbərdarlıq

İsmayıllı-Lahıc avtomobil yolunda hərəkət bərpa edilib.

Bu barədə Avtomobil Yolları Dövlət Agentliyindən məlumat verilib.

Bildirilib ki, iyunun 26-sı axşam saatlarından başlayaraq İsmayıllıya yağan leysan xarakterli yağış nəticəsində yaranan sel suları İsmayıllı-Lahıc avtomobil yolunun bir neçə ərazisində hərəkət hissəsinə özü ilə bərabər lil və qaya parçaları gətirərək avtonəqliyyat vasitələrinin fasiləsiz və təhlükəsiz hərəkətində problemlər yaradıb.

Dərhal əraziyə Agentlik tərəfindən canlı qüvvə və texnika cəlb edilərək təhlükəsizlik tədbirləri görülüb, yolda hərəkətin fasiləsizliyi və təhlükəsizliyinin təmin olunması üçün işlər aparılaraq hərəkət bərpa olunub. Hazırda lil və qaya parçalarının yolun hərəkət hissəsindən təmizlənməsi işləri davam etdirilir.