İstirahət mərkəzində dəhşətli yanğın

Qusarın Caqar kəndində “Park Qusar” istirahət mərkəzinin ərazisində yanğın baş verib.

FHN-dən verilən məlumata görə, yanğın nəticəsində istirahət mərkəzinin ərazisində ümumi sahəsi 240 m² olan ikimərtəbəli taxta konstruksiyalardan ibarət kotec yanıb.

Hadisə zamanı Emin Babayev, Zülfiyyə Babayeva, Rauf Babayev və Rüstəm Dadaşov dünyasını dəyişib. Həmçinin yanğın zamanı 6 nəfər şəxs − Larisa Repina, Olqa Dadaşova, Natalya Dadaşova, Denis Repin, Emil Dadaşov və Kamilla Dadaşova xəsarət alıb.

Yanğınla bağlı TƏBİB-dən verilən məlumata görə, hadisə nəticəsində xəsarət alan 6 nəfər Qusar Rayon Mərkəzi Xəstəxanasına yerləşdirilib. Onların hər birinə zəruri tibbi xidmətlər göstərilib.

Xəsarət alanlardan 5-i Nərimanov Tibb Mərkəzinin nəzdində olan Yanıq Mərkəzinə təxliyə edilib. Bir nəfərin müalicəsinə isə Qusar Rayon Mərkəzi Xəstəxanasında davam edilir. Xəsarət alanlardan ikisinin vəziyyəti ağır, digərlərinin vəziyyəti orta ağır qiymətləndirilir.

Faktla bağlı araşdırma aparılır.