Keçmiş baş həkim məhkəmə zalında həbs olundu

Dələduzluqda ittiham olunan Sabunçu Rayon 21 saylı Birləşmiş Şəhər Xəstəxanasının keçmiş baş həkimi Rauf İsfəndiyarov məhkəmə zalında həbs edilib. Bu, Bakı Ağır Cinayətlər Məhkəməsinin hakimi Səbinə Məmmədzadənin sədrliyi ilə keçirilən proses zamanı baş verib.

Təqsirləndirilən şəxsin vəkili İlqar Rüstəmov vəsatət qaldıraraq zərərçəkən Dəniz Əsədovanın anlaqsız ifadələr verdiyini və psixoloji durumunda problemlərin olduğunu əsas gətirərək məhkəmədən onunla bağlı tibbi ekspertiza təyin edilməsini xahiş edib. Məhkəmə qısa müşavirədən sonra vəsatətin əsassız olduğunu bildirib və bu səbəbdən təmin etməyib.

Daha sonra zərərçəkmiş şəxsin vəkilləri – Ceyhun Yusifov və Asim Abbasov vəsatət qaldırıblar. Onlar iş üzrə şahidlərin çoxluğu və təqsirləndirilən şəxsin zərərçəkmişlərə dəyən zərəri ödəməməsi səbəbindən onun haqqında polisin nəzarəti altına vermə qətimkan tədbirinin dəyişdirilərək barəsində həbs qətimkan tədbiri seçilməsini istəyiblər.

Məhkəmə qısa müşavirədən sonra zərərçəkmiş şəxsin vəkillərinin vəsatətlərini təmin edib və təqsirləndirilən şəxs Rauf İsfəndiyarov məhkəmə zalında həbs edilib. Daha sonra iş baxışa verilib. Məhkəmənin ilk baxış iclası fevralın 6-na təyin olunub.

Qeyd edək ki, təqsirləndirilən Rauf İsfəndiyarova qarşı Cinayət Məcəlləsinin bir neçə maddəsi ilə ittiham irəli sürülüb. İş üzrə zərərçəkmişlər isə müğənni Dəniz Əsədova, Dövlət Sosial Müdafiə Fondu və Səhiyyə Nazirliyidir. Təqsirləndirilən şəxsin dövlətə vurduğu zərərin 1 milyon 646 min manatdan artıq olduğu bildirilir. Rauf İsfəndiyarov müğənni Dəniz Əsədovadan aldatma yolu ilə 300 min manatdan artıq pul alıb. O, istintaq müddətində vəsaitin 100 min manatını geri versə də, digər hissəsini qaytarmayıb.