Kiməsə ziyan vuran adam deyil | Bıçaqlanan oğlanın anası hadisə anını danışdı

Gəncədə dayı ilə bacıoğlunun davası qanla bitib.

Hadisə əslən Kəlbəcərdən olan məcburi köçkünlər arasında onların yaşadıqları yataqxanada baş verib.

56 yaşlı Knyaz Məmmədov bacısı oğlu ilə yeyib-içdikdən sonra ona bıçaqla bir neçə xəsarət yetirib.

Bıçaqlanan gəncin anası Ayaz Misirova qardaşının içki aludəçisi olduğunu bildirib:

“Dünən bizə gəldi. Öz evində bir az içmişdi, sonra bizdə də içməyə davam etdi. Qardaşım təhqiramiz sözlər işlədəndə oğlum ona “get” dedi. O da çıxıb getdi. Axşam gördüm ki, oğlum evdə yoxdur. Birdən qonşular gəlib dedilər, qərargahdan gələnlər var. Bildirdilər ki, oğlumla qardaşım bir-birini bıçaqlayıb. Qardaşımdan heç kimə ziyan dəyməz, sadəcə içəndə başı gedir”.

Hadisə ilə bağlı hüquq-mühafizə orqanları tərəfindən araşdırma başlanılıb. Knyaz Məmmədov şübhəli şəxs qismində saxlanılıb.