Kliniki Tibbi Mərkəzdə qalmaqal | Ağcaqanad azyaşlını xəstəxanalıq etdi - Baku TV

Sosial şəbəkələrdə yayılan görüntülərdə iddia olunur ki, ağcaqanad dişləməsindən sonra səhhətində problem yaranan azyaşlı gecə saatlarında Kliniki Tibbi Mərkəzə gətirilib.

Valideynin sözlərinə görə, uşağın vəziyyətində halsızlıq və hərarət müşahidə olunsa da, həkimlər arasında fikir ayrılığı və mübahisə yaşanıb.

İddia edilir ki, azyaşlıya lazımi tibbi yardım göstərilməyib və o, ətraflı müayinə olunmadan evə göndərilib.

Məsələ ilə bağlı Kliniki Tibbi Mərkəzdən bildirilib ki, 6 iyun 2026-cı il tarixində 2016 və 2021-ci il təvəllüdlü iki azyaşlı ilə bağlı Təcili tibbi yardım şöbəsinə müraciət qeydə alınıb. Həkim tərəfindən aparılan müayinə zamanı pasiyentlərin toksikoloq tərəfindən konsultasiya edilməsi tövsiyə olunub. Konsultasiya zamanı həkim-cərrah və həkim-toksikoloq arasında xidməti fəaliyyətlə bağlı anlaşılmazlıq yaranıb və mühafizə xidməti yüksək səslə danışıq səbəbindən müdaxilə edib. Yaranmış vəziyyət tibb müəssisəsinin rəhbərliyi tərəfindən araşdırılıb və hər iki həkimə ciddi xəbərdarlıq edilib.