Kürdəmirdə dəhşətli qətlin təfərrüatı məlum oldu

Kürdəmirdə qətl hadisəsi baş verib. 55 yaşlı rayon sakini 46 yaşlı həmyerlisinə “Makarov” tipli tapança ilə 3 güllə vuraraq qətlə yetirib.

Hadisə rayonun 69-cu məhəlləsi adlanan ərazidə baş verib. Aralarında yaranan mübahisə zəminində rayonun Muradxan kənd sakini əvvəllər məhkum olunmuş 1968-ci il təvəllüdlü Cümşüd İslamov rayonun Sor-Sor kənd sakini hazırda Bakı şəhərində yaşayan 1977-ci il təvəllüdlü Müşviq Məmmədova “Makarov” tipli tapança ilə 3 güllə xəsarəti yetirib.

Yaralı dərhal ətrafdakı insanların köməyi ilə Kürdəmir Rayon Mərkəzi Xəstəxanasına aparılıb və əməliyyata alınıb. Həkimlərin səyinə baxmayaraq, onun həyatını xilas etmək mümkün olmayıb və o, elə xəstəxanada dünyasını dəyişib. Onun meyiti müayinə olunması üçün Səhiyyə Nazirliyinin Məhkəmə-Tibbi Ekspertiza və Pataloji Anatomiya Birliyinin Kürdəmir rayon şöbəsinə yerləşdirilib.

Hadisəni törədən Cümşüd İslamov isə Rayon Polis Şöbəsinin əməkdaşları tərəfindən şübhəli şəxs qismində saxlanılıb. Ondan cinayət aləti olan “Makarov” tapançası aşkar olunaraq götürülüb.

Qeyd edək ki, mərhum M.Məmmədov Bakı şəhərindən Kürdəmirə oğlunun Mingəçevir şəhərində baş tutacaq magistratura imtahanında iştirak etmək üçün gəlib. İyunun 10-da axşam saatlarında isə məlum hadisə baş verib.

Hazırda faktla bağlı Kürdəmir Rayon Prokurorluğunda araşdırmalara başlanılıb.